شعر عن امير المؤمنين الامام علي (ع)

... شعر عن الامام علي الكرار ...
هيعونه اللي يطوف بحضرتك مظلوم .. وهيعونه الي يشكي همومه بالحضره
ياسيف النبي ويافرحة المسكين .. ويا باب الصبر للي خلص صبره
تمنيت بضريحك روحي مني تروح .. يازوج البتول الطاهرة الحره
حتى الانبياء تندب علي الكرار .. اسمك يا علي بالموزمة شكبره
تاريخك مجد ياسيد التاريخ .. يا علم الفلك والكون والذرة
منو مثلك علي ضحّى شكثر للدين؟ .. وآخر تضحياته يضحي في عمره
وليش سموه أسد في معركة صفين؟ .. وبصولة بدر خله الزلم حدره
ومنهو اللي قهر أمة بني اسرائيل؟ .. وظلت إلى الان باسمه منقهره
علي اسمك قبل ما واحد مسميه .. جبرائيل خط اسمك على الصخرة
بالكعبة ياحيدر طلقت امك بيك .. وحتى الجن الازرق لبد في جحره
يونس ندب بيك انت قبل لا تصير .. وقال احضر علي وخلصنه هالمره
يندب يا علي المتضايق ومظلوم .. وليندب علي شقد ينفتح صدره
عفيه شقد عظيم انت يابو الابطال .. الجن والانس منك كلها متوشره
منو غيرك شفيع ألنه يبو الكلفات .. لو قامت الساعة بنارها الكبره
ياركن الرسالة ويابو ثأر الله .. ويا أول القدرة وآخر القدرة
وياسيف الفقار وقاري علم الغيب .. ويا بيرغ محمد ساعة الوزره
ياصنديد يل مثلك فلا موجود .. وكعبة آلطلقـــتك مو حقها مفتخره
عاشرنا طريقك بأول المشوار .. وبس ابن الزنى الي ينكر العشره
والله ياعلي من آنخاك وقت الضيج .. همومي تروح كلها وتنجلي الحسره
محمد بالغدير شقـال للأسلام .. مو وصى بعلي من بعده بالأمره
ويتبرى محمد منه يوم الدين .. كل من ما حزن في ليلة الطبره
علي وابنه حسين اللي عجب الثورات .. بيرغ رفع راسه بآخر الثورة
حسين آللي ما خذل دينه وكتاب الله .. شلون يذل الحسين وأمه الزهره
نادى الموت آولى من ركوب العار .. وخله جيوشهم عالأرض متطشره
وآبنك ابو فاضل بالغضب بركان .. ليث وبالشدايد محد يقدره
سحكها بالفرات وخله دمها يسيل .. تمنيت الفرات ينشف ولا قطره
لأن عطش جبود المصطفى الاحرار .. وعباس انغدر باليمنى واليسرى
مهموم اشتكيلك حالي يا مولاي .. آنا بصدري ياحيدر غافية العبرة
توازت يا علي والباطل السياف .. والحق صار آخرس وانكسر ظهره
ما يخدر جرحي ولا يريد يطيب .. اسم فرعون بيه الجرح شيخدره
الضلع طق وانكسر واختلت الاوزان .. ومنو غيرك غضنفر يكفي الجبره
ياحامي الحمى شنسوي محتارين .. تعبنا من الدماء والظلم والهجره
ما صارت قبل حتى بزمن نمرود .. اللي سواه يزيد وزمرته وشمره
انا منين اشتكيلك واحجي من يا باب .. من هذا الزمان القاسي وغدره
حقدوا عالنسل جيه من علي الكرار .. شجم هاشم آية ضيعوا ذكره
خلصنه انتهينه قـلي وين نروح .. وعيشتنه صفت يا عيشت القشرة
يا حاكم يجينه يكظ علينا السوط .. قسوا بسيوفهم وجفوفهم قذره
اعتقالات ومشانق سجل التاريخ .. وماكو من ظلمهم كل بشر يبره
شقد سنين عشنا بعالم الاحزان .. كل يوم اليجي نتأمل البشرى
من هالك لمالك ننشره وننباع .. ووطنه يا علي صار بورق سعره
لحد من سيدي استعمار باستعمار .. ويا حاكم يجينه محمل بشره
انطينه تضحيات من الشباب هواي .. مو مليون حتى تعدوا العشرة
شجا هذا الوطن بي كثرة الرايات .. كلمن رايته ودستوره وقصره
وشجا هذا الوطن ياوطن البترول .. الحرامية تحوف ومحد ينطره

جميل
تسلم ايدك اخي العزيز
دمت بخير
ودي

شكرا عالمرور

بارك الله بك أخي الكريم
ودمت بحفظ الله

» من حكم ومواعظ الامام امير المؤمنين علي ع
» اخذ البيعة من امير المؤمنين علي ع
» ولاية امير المؤمنين
» من اقوال امير المؤمنين علي ع
» نص امير المؤمنين ع علئ الائمة ع